2022  წლის 28 იანვარს, 15:00 საათზე, ნუგზარ ზაზანაშვილის სახელობის სამუხის მრავალმხრივი გამოყენების ტერიტორიის შექმნისა და მართვის შესახებ საქართველოს კანონპროექტის საჯარო განხილვა გაიმართება.
 
საქართველოს გარემოს დაცვისა და სოფლის მეურნეობის სამინისტრომ დაასრულა მუშაობა  ნუგზარ ზაზანაშვილის სახელობის სამუხის მრავალმხრივი გამოყენების ტერიტორიის შექმნისა და მართვის შესახებ საქართველოს კანონის პროექტზე.
აღნიშნულ კანონპროექტზე მუშაობა 2019 წელს, ბუნების დაცვის მსოფლიო ფონდის  (WWF)  მხარდაჭერით დაიწყო.
სამუხის ველი ქურციკების ერთადერთი საბინადრო გარემოა საქართველოში; შესაბამისად, რეგიონულ, ეროვნულ და ტრანსსასაზღვრო დონეზე ბიომრავალფეროვნების კონსერვაციის, ასევე, ზურმუხტის ქსელის და სპეციალური დაცული ტერიტორიების თვალსაზრისით, სამუხის გეგმარებითი დაცული ტერიტორიების შექმნას უდიდესი მნიშვნელობა ენიჭება.
დაინტერესებულ პირებს გამოქვეყნებული კანონპროექტის შესახებ შენიშვნებისა და მოსაზრებების  წარმოდგენა შეუძლიათ არაუგვიანეს 2022 წლის 27 იანვრისა, შემდეგ ელექტრონულ მისამართზე:   Teona.Karchava@mepa.gov.ge
დაინტერესებულ პირებს შეხვედრაში მონაწილეობა შეუძლიათ ZOOM პლატფორმის საშუალებით შემდეგ ლინკზე: https://us02web.zoom.us/j/85827724703?pwd=SldwZmdReDI0OWxCMEhFRitMNjU1UT09
19.01.2022
2022 წლის 26 იანვარს, 12:00 საათზე, გარემოს დაცვისა და სოფლის მეურნეობის სამინისტროს დაცული ტერიტორიების სააგენტოში (მის: გ.გულუას 6) ბორჯომ-ხარაგაულის ეროვნული პარკის ტყის ინვენტარიზაციის შედეგების საჯარო განხილვა გაიმართება. 

აღსანიშნავია, რომ 2021 წელს, ბორჯომ-ხარაგაულის ეროვნული პარკის ტყის ინვენტარიზაციის სამუშაოები განახორციელა ტენდერში გამარჯვებულმა კომპანიამ - შპს ,,მ3“.

2021 წლის 20 დეკემბერს, კომპანიამ სააგენტოში შემდეგი დოკუმენტაცია წარმოადგინა: 
  •  * ბორჯომ-ხარაგაულის ეროვნული პარკის ტყის მართვის გეგმის პროექტი;
 * ჯამური ცხრილები და დაპროექტებული ღონისძიებები;
 * ტაქსაციური აღწერები უბნების მიხედვით (ჯამში, 10 უბანი);
 *კარტოგრაფიული მასალები.

შენიშვნებისა და კომენტარებისთვის, 24 იანვრამდე, დაუკავშირდით დაცული ტერიტორიების სააგენტოს დაგეგმვისა და მართვის სამსახურის უფროს სპეციალისტს გიორგი კაპანაძეს (ელ.ფოსტა giokapana14@gmail.com).

საჯარო განხილვასთან დაკავშირებით დეტალური ინფორმაცია იხილეთ ბმულზე - https://bit.ly/3KlPXko
18.01.2022
გარემოს დაცვისა და სოფლის მეურნეობის სამინისტროს გარემოსდაცვითი ინფორმაციისა და განათლების ცენტრის ორგანიზებით გაიმართა ტრენინგები „ადმინისტრაციული სამართალდარღვევის საქმის წარმოება“. 
ტრენინგები ჩაუტარდათ გარემოსდაცვითი ზედამხედველობის დეპარტამენტის, სურსათის ეროვნული სააგენტოს და ბირთვული და რადიაციული უსაფრთხოების სააგენტოს 130-ზე მეტ თანამშრომელს.
 
თანამშრომლები გადამზადდნენ ადმინისტრაციული სამართალდარღვევათა კოდექსის და საქმის წარმოების მიმართულებით. ექსპერტებმა მონაწილეებს მიაწოდეს ინფორმაცია ადმინისტრაციული სამართალდარღვევის შემთხვევაში ოქმის შედგენის წესებისა და სახელმწიფო კონტროლის განხორციელების მექანიზმების შესახებ. 

ტრენინგები გაეროს განვითარების პროგრამის (UNDP) მხარდაჭერით, პროექტის „საქართველოში სოფლის მეურნეობასთან დაკავშირებული პროფესიული განათლების მოდერნიზაციის“ ფარგლებში გაიმართა.
24.12.2021
გარემოს დაცვისა და სოფლის მეურნეობის სამინისტროს გარემოსდაცვითი ინფორმაციისა და განათლების ცენტრის ორგანიზებით, „კლიმატის ცვლილებით გამოწვეული კატასტროფების რისკის შემცირება საქართველოში“ პროგრამის ფარგლებში, სათემო ფორუმი გაიმართა. შეხვედრა გარემოს დაცვისა და სოფლის მეურნეობის მინისტრის მოადგილემ, სოლომონ პავლიაშვილმა და გაეროს განვითარების პროგრამის (UNDP) მუდმივმა წარმომადგენელმა საქართველოში, ნიკ ბერესფორდმა გახსნეს.
სათემო ფორუმში ათი სამიზნე მუნიციპალიტეტის (ლაგოდეხი, თელავი, ახმეტა, სიღნაღი, გორი, სამტრედია, აბაშა, სენაკი, ხობი, ქობულეთი) მერები, სათემო  და საგანმანათლებლო ორგანიზაციების წარმომადგენლები მონაწილეობდნენ.
„ფორუმზე, მუნიციპალიტეტების წარმომადგენლებს მიეწოდათ ინფორმაცია, თუ როგორი უნდა იყოს მათი კონტრიბუცია კლიმატის ცვლილებებით გამოწვეული კატასტროფების რისკის შემცირების მიმართულებით. მნიშვნელოვანია, რომ პროექტის ფარგლებში გაფართოვდება ჰიდრომეტეოროლოგიური და აგრომეტეოროლოგიური სადამკვირვებლო ქსელი, განთავსდება 140 სადგური, რაც გააუმჯობესებს მოსალოდნელ სტიქიურ მოვლენებზე დროულ ინფორმირებას “, - განაცხადა სოლომონ პავლიაშვილმა.
„ძალიან მნიშვნელოვანია აღნიშნული პროგრამის განხორციელება. ჩვენ ვმუშაობთ ადგილობრივ პარტნიორებთან, ვისმენთ მათ პოზიციას და ვსწავლობთ მათგან. პროექტი საქართველოს 11 მდინარის აუზში ხორციელდება და უზრუნველყოფს საქართველოს 100-ზე მეტი მოწყვლადი თემის მედეგობას კლიმატის ცვლილებით გამოწვეული კატასტროფის რისკების მიმართ და იცავს მათ სიცოცხლეს და ხელს უწყობს ეკონომიკურ წინსვლას.“ - აღნიშნა ნიკ ბერესფორდმა.
შემაჯამებელ ფორუმზე, მონაწილეებმა განიხილეს კლიმატის ცვლილებით გამოწვეული საფრთხეები, რისკები და აღნიშნული მიმართულებებით ინფორმაციის ხელმისაწვდომობის მნიშვნელობა სოფლის მეურნეობისთვის; იმსჯელეს მუნიციპალიტეტების მიხედვით რეაგირების გეგმების შემუშავების პროცესზე; მიიღეს ინფორმაცია თემზე დაფუძნებული კატასტროფის რისკის მართვის სტრატეგიის, არსებული პრაქტიკისა და გამოწვევების შესახებ.
ფორუმის ფარგლებში გამოვლინდნენ კონკურსების „ისწავლე უსაფრთხო გარემოში“ და  „შექმენი უსაფრთხო თემი“ გამარჯვებულები. მათ კლიმატის ცვლილებით გამოწვეული რისკების შემცირების შესახებ წარმოდგენილი პროექტების განსახორციელებლად ფულადი ჯილდო გადაეცათ.
პროგრამა „კლიმატის ცვლილებით გამოწვეული კატასტროფების რისკის შემცირება საქართველოში“ დაფინანსებულია საქართველოს მთავრობის, კლიმატის მწვანე ფონდის (GCF), შვეიცარიის და შვედეთის მთავრობის მიერ, მის განხორცილებას კი, გაეროს განვითარების პროგრამა (UNDP) უზრუნველყოფს.
23.12.2021
გაეროს განვითარების პროგრამისა და საქართველოს გარემოს დაცვისა და სოფლის მეურნეობის სამინისტროს ერთობლივი პროგრამის „საქართველოში მონრეალის ოქმის განხორციელების სამოქმედო პროგრამის" ფარგლებში, სამაცივრო ტექნიკისა და ჰაერის კონდიცირების სექტორის სერტიფიცირებული ტექნიკოსებისთვის, მებაჟე ოფიცრებისა და გარემოსდაცვითი ინსპექტორებისთვის ტრენინგები გაიმართა.
ტრენინგების მიზანი პროფესიონალი კადრების სწავლება და გადამზადებაა, რადგან სწორედ მათ კვალიფიკაციაზე არის დამოკიდებული ატმოსფეროში ოზონდამშლელი ნივთიერებებისა და ფტორირებული სათბური აირების ემისიების შემცირება.

ტრენინგები ითვალისწინებდა თეორიულ და პრაქტიკულ მეცადინეობებს და მოიცავდა ისეთ მნიშვნელოვან თემებს, როგორიცაა ოზონდამშლელ ნივთიერებებთან დაკავშირებული ეროვნული რეგულირება და საკანონმდებლო ბაზა, ალტერნატიული ტექნოლოგიები და ენერგოეფექტურობის ზომები და მოწყობილობების უსაფრთხო მოპყრობა. 

ტრენინგები გარემოს დაცვისა და სოფლის მეურნეობის სამინისტროს გარემოსდაცვითი ინფორმაციისა და განათლების ცენტრის ორგანიზებით ჩატარდა.
 
„მემაცივრე ტექნიკოსები სერტიფიცირებას გადიან გარემოსდაცვითი ინფორმაციისა და განათლების ცენტრში, შესაბამისად, ჩვენთვის ძალიან მნიშვნელოვანია მათი პროფესიული ზრდის ხელშეწყობა, შესაძლებლობების გაძლიერება და ამ სექტორში განხორციელებული სიახლეების შესახებ ინფორმაციის მიწოდება, იმისათვის, რომ უფრო მეტად შევუწყოთ ხელი მათი საქმიანობის სფეროს პოპულარიზაციას“, -განაცხადა გარემოსდაცვითი ინფორმაციისა და განათლების ცენტრის დირექტორმა თამარ ალადაშვილმა.

„საქართველოში მონრეალის ოქმის განხორციელების სამოქმედო პროგრამა“  2009 წლიდან ხორცილედება და ხელს უწყობს მონრეალის ოქმით ნაკისრი ვალდებულებების, კერძოდ კი, ოზონდამშლელი ნივთიერებების ხმარებიდან ამოღების/შემცირების განხორციელებას.
15.12.2021
გარემოს დაცვისა და სოფლის მეურნეობის სამინისტროს გარემოსდაცვითი ინფორმაციისა და განათლების ცენტრში დისტანციური სასწავლო კურსი - „გარემოსდაცვითი მმართველი“ დასრულდა. კურსის ფარგლებში 14 მმართველი მომზადდა.

2021 წელს „გარემოსდაცვითი მმართველის“ 4 კურსი ჩატარდა, სადაც 57 მონაწილე გადამზადდა.  კურსის დასრულების შემდეგ, მათ აქვთ   კომპანიის ნარჩენების მართვის გეგმის მომზადების, განახლებისა და შიდა კონტროლის განხორციელების შესაძლებლობა.  მათი უმრავლესობა გარემოსდაცვითი მმართველის პოზიციაზეა დასაქმებული. 

გარემოს დაცვისა და სოფლის მეურნეობის სამინისტროს გარემოსდაცვითი ინფორმაციისა და განათლების ცენტრის სასწავლო პროგრამა კერძო სექტორისთვის ნარჩენების მართვის სფეროში არსებული ყველა ვალდებულების სწავლებას ითვალისწინებს და მოიცავს როგორც თეორიულ, ისე პრაქტიკულ ნაწილს ნარჩენების ელექტრონულ სისტემაში ანგარიშგების უზრუნველყოფის ხელშეწყობისთვის.

პროგრამა, რომელსაც მრავალწლიანი გამოცდილების მქონე დარგის სპეციალისტები უძღვებიან, კომპანიებს საშუალებას აძლევს, ჰყავდეთ კანონით დაკისრებული მოთხოვნებისა და თანამედროვე სტანდარტების გათვალისწინებით გადამზადებული სპეციალისტი.

„ნარჩენების მართვის კოდექსით“ კომპანიებს, რომლებიც წლის განმავლობაში 200 ტონაზე მეტ არასახიფათო, 1000 ტონაზე მეტ ინერტულ ან ნებისმიერი რაოდენობის სახიფათო ნარჩენს წარმოქმნიან, ეკისრებათ ვალდებულება, ჰყავდეთ ნარჩენების მართვაზე პასუხისმგებელი პირი - გარემოსდაცვითი მმართველი. 

სასწავლო კურსში მონაწილეობა შეუძლიათ, როგორც იურიდიული პირების მიერ წარმოდგენილ კანდიდატებს, ისე ნებისმიერ დაინტერესებულ პირს.
14.12.2021
გარემოს დაცვისა და სოფლის მეურნეობის მინისტრმა, ლევან დავითაშვილმა გარემოსდაცვითი ინფორმაციისა და განათლების ცენტრის ხელმძღვანელებთან გამართულ სამუშაო შეხვედრაზე მიმდინარე წელს შესრულებული სამუშაოს ანგარიში, სამომავლო გეგმები და გამოწვევები განიხილა.

შეხვედრაზე აღინიშნა, რომ მას შემდეგ, რაც ქვეყნის მასშტაბით წარმატებით დაინერგა სკოლამდელი გარემოსდაცვითი განათლების პროგრამა, გარემოსდაცვითი ინფორმაციისა და განათლების ცენტრი გარემოსდაცვითი და აგრარული საკითხების სწავლებას სკოლებში იწყებს. „გარემოსდაცვითი და აგრარული განათლება სკოლაში“ პროგრამის ეროვნულ დონეზე დასანერგად, დაწყებითი საფეხურის პედაგოგების გადამზადების პროცესი ცენტრმა აქტიურად დაიწყო. 1538 პედაგოგი უკვე გადამზადებულია. ამ მიმართულებით დაწყებითი საფეხურის პედაგოგების გადამზადების პროცესი 2022 წელსაც გაგრძელდება. პროექტი 4 წლის განმავლობაში განხორციელდება და მთელ საქართველოს დაფარავს. „გარემოსდაცვითი და აგრარული განათლება სკოლაში“ პროგრამის სასკოლო სივრცეში ინტეგრირება ხელს შეუწყობს მომავალი თაობების სწორი გარემოსდაცვითი ღირებულებებისა და აგრარული ცნობიერების განვითარებას.
პროგრამის ფარგლებში 2020 წელს შემუშავდა სახელმძღვანელო „გარემოსდაცვითი და აგრარული განათლება სკოლაში“. სახელმძღვანელო გააძლიერებს პედაგოგების შესაძლებლობებს, ხოლო  მოსწავლეებს დაეხმარება ბაზისური ცოდნა მიიღონ ისეთ მნიშვნელოვან საკითხებზე, როგორებიცაა მდგრადი განვითარება, ბიომრავალფეროვნების დაცვა, წყლის რესურსების დაცვა, ჰაერის დაცვა დაბინძურებისგან, კლიმატის ცვლილება და ბუნებრივი საფრთხეების შემცირება, ნარჩენების მართვა, მიწის მართვა და გაუდაბნოების წინააღმდეგ ბრძოლა, მდგრადი სოფლის მეურნეობა, სურსათის უვნებლობა და ხარისხი. 

პროგრამის დისტანციურ რეჟიმში დანერგვის ხელშესაწყობად შეიქმნა ასინქრონული კურსი, რაც ხელს შეუწყობს მასწავლებლებს, გაიარონ პროგრმა მათთვის სასურველ დროს და მიიღონ შესაბამისი სერტიფიკატი. 

გარემოსდაცვითი ინფორმაციისა და განათლების ცენტრი ფერმერებს, აგრარული მიმართულების სტუდენტებსა და ამ დარგით დაინტერესებულ პირებს შესაძლებლობების გაძლიერებისთვის უფასო ტრენინგებს სთავაზობს. აგრარული განათლების ხელშეწყობის მიზნით ცენტრის მიერ მიმდინარე წელს 332 ფერმერი გადამზადდა.

ცენტრს დაწყებული აქვს მოკლევადიანი მომზადება-გადამზადების პროგრამისთვის ავტორიზაციის მოპოვების პროცესი და „გარემოსდაცვითი მმართველის”, „კლიმატგონივრული სასწავლო კურსის”  და „ტყის ინვენტარიზაცია და ტაქსაცია” სასწავლო კურსების აკრედიტაციას უახლოეს პერიოდში გეგმავს. 

ცენტრის კოორდინაციით, 2021 წელს მომზადდა „გარემოსდაცვითი პასუხისმგებლობის” კანონის კანონქვემდებარე აქტების პროექტები, რაც ხელს შეუწყობს გარემოსდაცვითი პასუხისმგებლობის სისტემის დანერგავს. 

ასევე, მწვანე ეკონომიკის და მდგრადი შესყიდვების ხელშესაწყობად, მდგრადი საჯარო შესყიდვების პრინციპები აისახა სახელმწიფო შესყიდვების კანონპროექტში და შემუშავდა შესაბამისი კანონქვემდებარე აქტი.
10.12.2021
2021 წლის 14 დეკემბერს 11:00 სთ-ზე საქართველოს გარემოს დაცვისა და სოფლის მეურნეობის სამინისტროს ორგანიზებით და ორგანიზაცია CENN-ის მიერ, პროექტის - ტყის მდგრადი მართვა სოფლის განვითარებისათვის - ფარგლებში, ავსტრიის განვითარების თანამშრომლობის  ფინანსური მხარდაჭერით გაიმართება „ეროვნული სატყეო პროგრამის“ მე-8 პლენარული სხდომა.
„ეროვნული სატყეო პროგრამის“ პლენარული სხდომა 2013 წლიდან იმართება, რომლის ფარგლებშიც განიხილება სატყეო სექტორში წლის განმავლობაში განხორციელებული და სამომავლოდ დაგეგმილი ქმედებები. მე-8 პლენარულ სხდომაზე ბიომრავალფეროვნებისა და სატყეო დეპარტამენტი წარმოადგენს ინფორმაციას კლიმატის მწვანე ფონდის (GCF) (მხარდამჭერები-გერმანიის მთავრობა, შვეიცარიის მთავრობა და საქართველოს მთავრობა), მიერ დაფინანსებული ახალი პროექტის თაობაზე, ასევე, შეჯამდება 2017-2021 წლების პერიოდში ჩატარებული და დასრულებული ტყის პირველი ეროვნული აღრიცხვის შედეგები. პლენარულ სხდომაზე განიხილება განხორციელებული და მიმდინარე საკანონმდებლო სიახლეები, საქართველოში პირველი ბიოსფერული რეზერვატის ნომინაციის საკითხები, ასევე, ტყის მართვის სფეროში დანერგილი სიახლეები და მიღწევები.  შეხვედრის მეორე ნაწილი დაეთმობა ტყის სექტორში დონორთა კოორდინაციის საკითხებს.
დაინტერესებულ საზოგადოებას პრეზენტაციებს წარუდგენენ საქართველოს გარემოს დაცვისა და სოფლის მეურნეობის სამინისტროს ბიომრავალფეროვნებისა და სატყეო დეპარტამენტის წარმომადგენლები, ასევე, სსიპ ეროვნული სატყეო სააგენტოს, სსიპ დაცული ტერიტორიების სააგენტოს და სსდ გარემოსდაცვითი ზედამხედველობის დეპარტამენტის თანამშრომლები.
 
დაინტერესებულ პირებს შეხვედრაში მონაწილეობა შეუძლიათ ZOOM პლატფორმის საშუალებით შემდეგ ლინკზე:
 
https://us02web.zoom.us/j/82464392344?pwd=eHE5d0M4WEllQWZYN21rZ2I1K210QT09

Meeting ID: 824 6439 2344
Passcode: 511243

 
დამატებითი ინფორმაციისთვის, გთხოვთ, დაუკავშირდით ეროვნული სატყეო პროგრამის კოორდინატორს, ქალბატონ ნანა ხელხელაურს (ტელ: +995 598 301 222), email: Nanakhelkhelauri@gmail.com.
08.12.2021
საქართველოს გარემოს დაცვისა და სოფლის მეურნეობის სამინისტრომ დაასრულა მუშაობა „ბიოლოგიური მრავალფეროვნების შესახებ“ საქართველოს კანონის პროექტის განახლებულ ვერსიაზე. 
07.12.2021
გარემოს დაცვისა და სოფლის მეურნეობის სამინისტროს გარემოსდაცვითი ინფორმაციისა და განათლების ცენტრის ორგანიზებით ონლაინ საინფორმაციო შეხვედრა „მოხალისეობა და გარემოს დაცვა“ მოხალისეთა საერთაშორისო დღესთან დაკავშირებით გაიმართა. შეხვედრაზე განიხილეს მოხალისეობის როლი და მნიშვნელობა, განსაკუთრებით გარემოს დაცვის და მდგრადი განვითარების მიზნების განხორციელების მიმართულებით. 
ახალგაზრდა მოხალისეებმა ჰელგინგ ჰენდის პროექტების კოორდინატორის ნინო თოდუასგან მიიღეს ინფორმაცია მოხალისეობის პლატფორმისა და სარგებელზე თვითონ მოხალისეებისთვის. საკუთარი გამოცდილება გააზიარა ირაკლი ჯიქიამ, რომელიც 2016 წელს საქართველოს მოხალისედ დასახელდა და მას შემდეგ აქტიურად არის ჩართული მოხალისეობის განვითარებასა და პოპულარიზაციის საკითხებში.
გარემოსდაცვითი ინფორმაცისა და განათლების ცენტრმა პროექტის - „კლიმატის ცვლილებით გამოწვეული კატასტროფების რისკის შემცირება საქართველოში“  სამინზე მუნიციპალიტეტში ახალგაზრდა მოხალისეთა ჯგუფი შექმნა, რომლებიც აქტიურად ჩაერთვებიან გარემოსდაცვით ღონისძიებებში, განსაკუთრებით კი კლიმატის ცვლილებით გამოწვეული კატასტროფების რისკების შემცირებაში.
5 დეკემბერი მოხალისეთა საერთაშორისო დღედ 1985 წელს დააწესა გაერთიანებული ერების ორგანიზაციამ. მოხალისეობრივი ღონისძიებების განხორციელება მნიშვნელოვანია მდგრადი განვითარების ყველა მიზნის  მისაღწევად
06.12.2021
გარემოსდაცვითი დემოკრატიის პრინციპების, ღია მმართველობის  პარტნიორობისა და ორჰუსის კონვენციის შესახებ, ვესტმინსტერის დემოკრატიის ფონდის ორგანიზებით,  სამუშაო შეხვედრა გაიმართა. ღონისძიება გარემოს დაცვისა და ბუნებრივი რესურსების კომიტეტის თავმჯდომარემ, მაია ბითაძემ, საქართველოში გაერთიანებული სამეფოს საელჩოს პროგრამების ხელმძღვანელმა ელენ ვიხმანმა და ვესტმინსტერის დემოკრატიული ფონდის პროგრამის მენეჯერმა, ენდრიუ პარკინსონმა გახსნეს. შეხვედრაზე გარემოს დაცვისა და სოფლის მეურნეობის სამინისტროს გარემოსდაცვითი ინფორმაციისა და განათლების ცენტრის დირექტორმა, თამარ ალადაშვილმა საქართველოში გარემოსდაცვითი დემოკრატიის, ორჰუსის კონვენციის განხორციელებისა და ამ მიმართულებით ცენტრის როლის შესახებ პრეზენტაცია წარადგინა. 
შეხვედრაზე გარემოსდაცვითი დემოკრატიისა და მისი მთავარი პრინციპების შესახებ იმსჯელეს, სხვადასხვა ქვეყნების საუკეთესო  მაგალითები და გარემოსდაცვით დემოკრატიასა და ღია მმართველობის პარტნიორობას შორის ურთიერთკავშირიის საკითხები განიხილეს.
აღსანიშნავია, რომ ვესტმინსტერის დემოკრატიის ფონდი, ბრიტანეთის მთავრობის მხარდაჭერით, გარემოსდაცვითი დემოკრატიის ხელშეწყობის პროგრამას ახორციელებს. ფონდის მიერ ორგანიზებული შეხვედრის გამართვა მიზნად ისახავდა გარემოსდაცვითი დემოკრატიის პრინციპების შესახებ ცნობიერების ამაღლებას და ამ მიმართულებით სამომავლო გეგმის განსაზღვრას.
03.12.2021
გარემოს დაცვისა და სოფლის მეურნეობის სამინისტროს გარემოსდაცვითი ინფორმაციისა და განათლების ცენტრის ორგანიზებით, „გარემოსდაცვითი პასუხისმგებლობის შესახებ“ საქართველოს მთავრობის დადგენილებების  პროექტების საჯარო განხილვა გაიმართა. მნიშვნელოვანია აღინიშნოს, რომ საჯარო განხილვები ხელს უწყობს გადაწყვეტილების მიღების პროცესში დაინტერესებული საზოგადოების წარმომადგენელთა მაქსიმალურ ჩართულობას.
შეხვედრა გარემოსდაცვითი ინფორმაციისა და განათლების ცენტრის დირექტორმა, თამარ ალადაშვილმა გახსნა. გარემოსდაცვითი პასუხისმგებლობის კანონის შესახებ გარემოსდაცვითი ზედამხედველობის დეპარტამენტის იურიდიული სამსახურის უფროსმა, არჩილ ადამიამ ისაუბრა, კანონქვემდებარე აქტების პროექტები მონაწილეებს მთავარმა სახელმწიფო ინსპექტორმა, ნელი კორკოტაძემ გააცნო. 
საჯარო განხილვა ონლაინ გაიმართა და მასში მონაწილეობის შესაძლებლობა ყველა დაინტერესებულ პირს ჰქონდა. მონაწილეებმა კანონთან მიმართებაში თავიანთი მოსაზრებები წარადგინეს. 
,,გარემოსდაცვითი პასუხისმგებლობის შესახებ” კანონი, რომელიც 2021 წელს დამტკიცდა, „დამბინძურებელი იხდის“ პრინციპს ეფუძნება და მისი მიზანი გარემოსთვის ზიანის მიყენებასთან დაკავშირებული საკითხების პრევენციის და აღმოფხვრის ხელშეწყობაა. კანონის თანახმად, თუ საწარმო, საქმიანობის შედეგად, მნიშვნელოვნად დააზიანებს გარემოს, ის თავად იქნება ვალდებული, გაიღოს საჭირო ფინანსური რესურსი და აღმოფხვრას გარემოსთვის მიყენებული ზიანი.
აღსანიშნავია, რომ აღმოსავლეთ ევროპის ქვეყნებში საქართველო პირველია, რომელიც ქმნის, გარემოსდაცვით ფონდს. გარემოსთვის მიყენებული ზიანის ანაზღაურებისთვის გადახდილი თანხები მიემართება სახელმწიფო ბიუჯეტში შექმნილ სპეციალურ ანგარიშზე, ე.წ., გარემოსდაცვით ფონდში. აღნიშნულ ფონდში დაგროვებული თანხები მოხმარდება გარემოს მდგომარეობის გასაუმჯობესებელი ღონისძიებების დაგეგმვას და განხორციელებას.
„გარემოსდაცვითი პასუხისმგებლობის შესახებ” საქართველოს კანონის კანონქვემდებარე ნორმატიული აქტების პროექტები შემუშავდა გარემოს დაცვისა და სოფლის მეურნეობის სამინისტროს მიერ, გაეროს განვითარების პროგრამის (UNDP) და შვედეთის მთავრობის მხარდაჭერით, მმართველობის რეფორმის ფონდის (GRF) პროექტის ფარგლებში.
01.12.2021
 1 2 3 4 5 6 7 8 9 10 
Displaying results 1-12 (of 815)

Latest news