სასკოლო სახელმძღვანელოების ავტორებისთვის ტრენინგები გაიმართა

გარემოს დაცვისა და სოფლის მეურნეობის სამინისტროს გარემოსდაცვითი ინფორმაციისა და განათლების ცენტრმა სასკოლო სახელმძღვანელოების „მე და საზოგადოება” (III-IV კლასებისთვის) და „ჩვენი საქართველო” (V-VI კლასებისთვის) ავტორებისთვის გარემოსდაცვით საკითხებზე ტრენინგები ჩაატარა, რომლის მიზანიც სასკოლო სახელმძღვანელოებში გარემოსდაცვითი საკითხების სწორად ასახვაა.

ტრენინგები მოიცავდა გარემოსდაცვით სამ თემას: ადამიანის გარემოსდაცვითი უფლებები და ვალდებულებები, საქართველოს დაცული ტერიტორიები და კლიმატის ცვლილებით გამოწვეული კატასტროფების რისკის შემცირება. შეხვედრის მონაწილეებს დამხმარე სახელმძღვანელო მასალაც მიეწოდათ.

სასკოლო სახელმძღვანელოების გრიფირების გამოცხადებამდე, მიმდინარეობს საგნობრივი სტანდარტების გადახედვა და მასში ცვლილებების შეტანა. სახელმძღვანელოების „მე და საზოგადოება” (III-IV კლასებისთვის) და „ჩვენი საქართველო” (V-VI კლასებისთვის) საგნობრივი სტანდარტები მოიაზრებს ისეთ თემებს, როგორიცაა: გარემოს დაცვა, ადამიანის უფლებები, დაცული ტერიტორიები, სტიქიური მოვლენები და კატასტროფების რისკის შემცირება.