კონკურსის „კოლეჯების აგრო-ლიგა“ გამარჯვებულები გამოვლინდნენ

კონკურსი „კოლეჯების აგრო-ლიგა“ გარემოსდაცვითი და სოფლის მეურნეობის დარგების მიმართულებით პროფესიული განათლების სექტორის პოპულარიზაციის მიზნით გაიმართა. 

კონკურსში მონაწილეობდნენ პროფესიული სასწავლებლების სტუდენტები, კურსდამთავრებულები, აგრო  და გარემოსდაცვითი პროფილის სკოლის მოსწავლეთა კლუბები.  საკონკურსო თემები მოიცავდა მეხილეობას, მეფუტკრეობას, სატყეო საქმესა და გარემოს დაცვას.

გარემოს დაცვისა და სოფლის მეურნეობის მინისტრის მოადგილემ, სოლომონ პავლიაშვილმა კონკურსის „კოლეჯების აგრო-ლიგა“ გამარჯვებულები დააჯილდოვა. გამარჯვებულებს სერტიფიკატები და საჩუქრები გადაეცათ.

როგორც სოლომონ პავლიაშვილმა აღნიშნა, კონკურსი ხელს უწყობს აგრარული სფეროს პროფესიული განათლების სექტორის განვითარებას და აგრარული პროფილის სასწავლო პროგრამების მქონე  პროფესიული სასწავლებლების წარმატებული სტუდენტების და კურსდამთავრებულების წარმოჩენას.  

კონკურსი განხორციელდა სოფლის მეურნეობის განვითარების ასოციაციის (ADA) მიერ  ინოვაციების და ცვლილებების ინსტიტუტის (ICI) ფინანსური მხარდაჭერით, გაეროს განვითარების პროგრამის (UNDP),  შვეიცარიის განვითარებისა და თანამშრომლობის სააგენტოს (SDC) და გარემოსდაცვითი ინფორმაციისა და განათლების ცენტრის მხარდაჭერით.