დაცული და სხვა კონსერვაციული ტერიტორიების კონცეფციის საჯარო განხილვა

საქართველოს გარემოს დაცვისა და სოფლის მეურნეობის სამინისტროს (MEPA) ინიციატივითა და  შვედეთის მთავრობის (შვედეთის განვითარების და თანამშრომლობის სააგენტოს (SIDA) ფინანსური მხარდაჭერით, პროექტის ,,გადავარჩინოთ ბუნება - საქართველო” ფარგლებში, მომზადდა დაცული და სხვა კონსერვაციული ტერიტორიების კონცეფციის სამუშაო ვერსია. 

კონცეფცია, როგორც სექტორული პოლიტიკის დოკუმენტი, ასახავს დაცულ და სხვა კონსერვაციულ ტერიტორიებზე ბუნების კონსერვაციის მიმართულებით ეროვნულ ხედვას და უზრუნველყოფს დაცული ტერიტორიების ეფექტური პოლიტიკისა და კარგი მმართველობის სისტემის ჩამოყალიბებას მსოფლიოს საუკეთესო პრაქტიკის, სტანდარტების და პრინციპების გათვალისწინებით. იგი ადგენს სფეროსთვის კრიტიკულად მნიშვნელოვან პრიორიტეტებსა და პრინციპებს და წარმოადგენს ბიომრავალფეროვნების კონსერვაციისთვის ერთ-ერთი უმთავრესი ინსტრუმენტის - დაცული ტერიტორიების სისტემის გაძლიერებისა და სრულყოფის დარგობრივი პოლიტიკის საფუძველს  ბიოლოგიური მრავალფეროვნების  შესახებ კონვენციის „კუნმინ-მონრეალის ბიომრავალფეროვნების გლობალური ჩარჩოს“ მე–3 მიზნის შესაბამისად. 

დაცული და სხვა კონსერვაციული ტერიტორიების კონცეფციაზე მუშაობის პროცესი წარიმართა ღია, ინკლუზიურ და თანამშრომლობით გარემოში სხვადასხვა დაინტერესებულ მხარესთან ფართო კონსულტაციების ფარგლებში. 

აღნიშნულ დოკუმენტთან დაკავშირებით, დაინტერესებული მხარეებისგან მოსაზრებების მისაღებად და საბოლოო ვერსიის მოსამზადებლად, დაცული და სხვა კონსერვაციული ტერიტორიების კონცეფციის სამუშაო ვერსიის საჯარო განხილვა გაიმართება 2025 წლის 30 იანვარს, 15:00 საათზე. 

დაინტერესებულ პირებს შეხვედრაში მონაწილეობა შეუძლიათ ZOOM პლატფორმის საშუალებით შემდეგ ლინკზე: https://us06web.zoom.us/j/8118410626?omn=87666258445

დაინტერესებულ პირებს გამოქვეყნებული კანონპროექტების შესახებ შენიშვნებისა და მოსაზრებების  წარმოდგენა შეუძლიათ არაუგვიანეს 2025 წლის 15 თებერვლისა შემდეგ ელექტრონულ მისამართზე: Teona.Karchava@mepa.gov.ge